नाडा अटो शोमा बीवाईडीले एम–६ कार ल्याउने

काठमाडौं– आगामी भाद्र ११ गतेदेखि काठमाडौंको भृकुटीमण्डपमा आयोजना हुने नाडा अटो शोमा बीवाईडीको नेपालका लागि आधिकारिक बिक्रेता साइमेक्स इंकले एम-६ कार ल्याउने भएको छ ।

कम्पनीले यसबारेमा आधिकारिक धारणा सार्वजनिक गरेको छैन । तर कम्पनी स्रोतका अनुसार कम्पनीले नाडा शोको मौका पारेर नयाँ मोडलका कार ल्याउन लागेको हो ।

चीनमा यसअघि लेफ्ट ह्यान्ड ड्राइभमा मात्र उपलब्ध रहँदै आएको यो कारलाई बीवाईडीले हालसालै राइट ह्यान्ड ड्राइभ सिस्टममा समेत ल्याएपछि नेपाल आउने बाटो खुला भएको हो । बीवाइडीले यसलाई सङ म्याक्स हाईब्रिडमा आधारित भएर उत्पादन गर्दै आएको छ । यो कार ४.७ मिटर लामो, १.८१ मिटर चौडा र १.८८ मिटर अग्लो छ । साथै यसको ह्विलवेश २।७८ मिटर छ ।

एम६ मा ७१.७ किलोवाट आवरको ब्लेड ब्याट्री जडान गरिएको छ । ब्याट्रीलाई एकपट फुल चार्ज गर्दा ५२२ किलोमिटर रेन्ज पाइने कम्पनी दावी छ । चीनमा ४ वटा भेरिएन्टमा उपलब्ध एम६ को कुन भेरिएन्ट नेपाल आँउछ भन्ने विषयमा हालसम्म टुंगो भने लागिसकेको छैन ।