सिजी मोटर्सद्वारा जीएसी एवोन भीको बुकिङ खुला, जनवरीको अन्तिमबाट डेलिभरी

काठमाडौं– सिजी मोटर्सले दुई भेरियन्टमा जीएसी एवोन भीको बुकिङ खुला गरेको छ । सिजी मोटर्सले गत भदौमा सम्पन्न नाडा अटो शो २०२४ मा एवोन भीको लेफ्ट ह्याण्ड ड्राइभ मोडल ल्याएर प्रदर्शनी गरेको थियो । कम्पनीले आगामी जनवरी अन्तिमबाट बिक्री गर्ने योजनासहित बुकिङ खुला गरेको हो ।

सर्ट रेन्ज र लङ रेन्ज गरी दुई भेरियन्टमा आउन लागेको एवोन भीमा ६२ र ७५ किलोवाट आवरको दुई ब्याट्री अप्सन दिइएको छ । कम्पनीले यसको मूल्य ६५ देखि ७० लाख भित्रै रहनेगरी बुकिङ खुलाएको हो ।

सबै किसिमका आधुनिक फिचर भएको गाडीलाई ५० हजार रुपैयाँ तिरेर बुकिङ गर्न सकिने कम्पनीले जनाएको छ । यस ईभीमा सिएटीएलको ब्याट्री दिइएको छ । जसलाई १५ मिनेट चार्ज गर्दा ३७० किलोमिटर गुडाउन सकिने कम्पनीले जनाएको छ ।
सिजीले नेपाल ल्याउने एवोन भी मोडलमा ७५ किलोवाट आवर क्षमताको ब्याट्री रहने छ । यसले सिंगल चार्जमा ६५० किलोमिटर रेन्ज दिने सिएलटीसी टेष्टले देखाएको छ ।