काठमाडौं– चिनियाँ अटोमोबाइल ब्रान्ड एक्सपेङको नेपालका लागि आधिकारिक बिक्रेता सीजी मोटर्सले चितवनमा शोरुम विस्तारसँगै एक्सपेङको नयाँ जी–६ मोडल पनि लञ्च गरेको छ ।
सीजी मोटर्सले युरो मोटर्सलाई चितवन क्षेत्रका लागि आधिकारिक डिलरको रूपमा औपचारिक रूपमा घोषणा गरेसँगै चितवनमा नयाँ शोरुम विस्तार गरेको हो । काठमाडौं र पोखरामा सफलतापूर्वक शोरुमको स्थापना पश्चात चितवनको लञ्चले नेपालमा एक्सपेङको उपस्थिति थप विस्तार गरेको छ, जसले स्थानीय ग्राहकहरूलाई अत्याधुनिक, वातावरणमैत्री सवारीसाधन र भरपर्दो सेवा प्रदान गरिरहेको कम्पनीले जनाएको छ ।
उक्त कार्यक्रममा चितवन उद्योग वाणिज्य संघका अध्यक्ष सुमन श्रेष्ठ, यूरो मोटर्सका प्रबन्ध निर्देशक सन्तोष भट्टराई, वडा नम्बर २ का अध्यक्ष मनोज रानाभाट र सीजी मोटर्सका प्रमुख कार्यकारी अधिकृत हेमन्त अग्रवालको उपस्थिति रहेको थियो ।
लञ्च कार्यक्रममा एक्सपेङको नयाँ जी६ मोडल प्रस्तुत गरिएको थियो, जसले स्मार्ट प्रविधि र दिगो डिजाइनमा जोड दिएको छ। जी ६ ले विश्वकै उच्च सुरक्षा परीक्षण ईएनसीएपीमा ५ स्टार रेटिङ प्राप्त गरेको छ। जी ६ को मोटर पावर १९० किलोवाट र टर्क ४४० एनएम छ, जसले ६६ किलोवाट ब्याट्री प्याकसहित ४३५ किलोमिटरको रेन्ज दिन्छ ।
प्रतिक्रिया