नेपाली बजारमा जिकर

काठमाडौं– सारडा ग्रुप अन्तर्गतको पायोनियर मोटोकर्पले चिनियाँ ब्राण्ड जिलीको प्रिमियम इलेक्ट्रिक ब्राण्ड जिकर एक्सको दुई भेरियन्ट नेपाल भित्र्याएको केही समयपछि सोमबार औपचारिक रुपमा सार्वजनिक गरेको छ । कम्पनीले जिकर एक्स भाद्र ११ गतेदेखि १६ गतेसम्म काठमाडौंमा भएको नाडा अटो शोमा पनि प्रदर्शन गरेको थियो ।

सोमबार भने भौतिक पूर्वाधार तथा यातायात मन्त्री देवेन्द्र दाहालले एक समारोहका बीचमा उक्त गाडी नेपाली बजारका लागि औपचारिक रुपमा सार्वजनिक गर्नुभएको हो । समारोहमा बोल्दै मन्त्री दाहालले विश्वमा इन्धनबाट चल्ने गाडी विस्तारै विस्थापित हुँदै गएको बताउँदै नेपालमा पनि पछिल्लो चरणमा बिद्युतीय सवारी साधनहरु बढ्दै गएको बताउनुभयो ।

जिकर एक्सको रियल ह्वील ड्राइभ स्ट्यान्डर्ड भेरियन्टमा २०० किलोवाट क्षमताको मोटर छ भने अल ह्वील ड्राइभ फ्लागसिप भेरियन्टमा ३१५ किलोवाट मोटर राखिएको छ । ४४० किलोमिटर रेञ्ज दिने जिकर एक्समा ६६ किलोवाट आवरको ब्याट्री प्याक छ । यो गाडीमा २२ किलोवाट क्षमताको एसी चार्जर सपोर्ट गर्छ । यसमा रहेको एसी चार्जरले ४ घण्टामा गाडी फुल चार्ज गर्न सक्नेछ । डिसी चार्जर भने १५० किलोवाटसम्मको सपोर्ट गर्ने कम्पनीले जनाएको छ ।

यो गाडीको रियल ह्वील ड्राइभको मूल्य ८४ लाख ९९ हजार र अल ह्वील ड्राइभको मूल्य १ करोड ५४ लाख ९९ हजार रहेको कम्पनीले जनाएको छ । नाडा अटो शो २०२४ मा भने कम्पनीले छूट दिंदै रियल ह्वीलको ७९ लाख ९९ हजार र अल ह्वीलको १ करोड ४९ लाख ९९ हजार तोकेको थियो ।