नाडाको साधारणसभामा इभीको इकोसिस्टममा सरकारले ध्यान नदिएको गुनासो

काठमाडौं– नाडा अटोमोवाइल्स एशोसिएशन अफ नेपालको ४८ औं साधारण सभाको उद्घाटन सत्रमा आइतबार विद्युतीय साधनका विषयमा वक्ताहरुले चर्चा गरेका छन ।

साधारणसभामा भौतिक पूर्वाधार तथा यातायात मन्त्री देवेन्द्र दाहालले बिद्युतीय सवारी साधनको इकोसिस्टम तथा अन्य पूर्वाधार निर्माण गर्न सरकार लागिपरेको बताए । बिद्युतीय सवारी साधन अहिलेको आवश्यकता हो भन्दै मन्त्री दाहालले अहिले विश्वमा नै यसको चर्चा र छलफल भईरहेको पनि बताए । बिद्युतीय सवारी साधनमा प्रयोग हुने ब्याट्री डिस्पोजल गर्ने कुरा सबैका लागि चुनौंती भएको भन्दै मन्त्री दाहालले यसमा अध्ययन गरिरहेको पनि बताए ।

साधारणसभामा नाडा अध्यक्ष करण चौधरीले विद्युतीय सवारी साधनलाई गिजोल्ने काम भइरहेको बताए । इभीको इकोसिस्टममा सरकारले ध्यान नदिएको गुनासो गरे । ‘हामी विद्युतीय सवारी साधन यहीँ परीक्षण गर्न सक्छौं । हामीले गर्ने परीक्षणलाई सरकारले मान्यता दिने कानुनी आधार तयार पार्नुपर्छ, अध्यक्ष चौधरीले भने ।

इकोसिस्टम निर्माणमा व्यवसायीले धेरै लगानी गरेपनि सरकारले भने केही स्थानमा चार्जिङ स्टेशन मात्रै निर्माण गरिदिएको अध्यक्ष चौधरीले बताए । नेपाल बिद्युत प्राधिकरणले चार्जिङ स्टेशन थप गर्ने योजना अगाडि नबढाउँदा आउने दिनमा ईभीको भविष्यमा नै प्रश्न उठेको अध्यक्ष चौधरीको दावी थियो ।

सभालाई सम्बोधन गर्दै नेपाल उद्योग वाणिज्य महासंघका अध्यक्ष चन्द्रप्रसाद ढकालले ‘राजश्वमा २० प्रतिशत हाराहारी हिस्सा ओगटेको अटोमोवाइल क्षेत्रलाई थप बलियो बनाउन नीतिगत सहयोग र पूर्वाधार विकासमा सरकारले ध्यान दिनु पर्ने बताए ।