नाडा अटो शो २०२४ आजदेखि भृकुटीमण्डपमा, झण्डै २० अर्बको कारोवार हुने अपेक्षा

काठमाडौं– अटो व्यवसायीहरुको ‘कुम्भ मेला’ को रुपमा रहेको नाडा अटो शो २०२४ आजदेखि काठमाडौंको भृकुटीमण्डपमा शुरु भएकोे छ ।

भाद्र ११ गतेदेखि १६ गतेसम्म काठमाडौंको भृकुटीमण्डप प्रदर्शनीस्थलमा आयोजना हुने नाडा अटो शोमा २४ चार पाङ्ग्रे ब्राण्ड, १९ दुई पाङ्ग्रे ब्राण्ड र १२ हल्का व्यावसायिक सवारी साधनहरु प्रदर्शन गरिने नाडा अटोमोबाइल एसोसिएसन अफ नेपालले जनाएको छ ।

प्रदर्शनीमा ३३ कम्पनीहरुले लुब्रिकेन्ट्स, टायर, ब्याट्री, ग्यारेज उपकरण र अन्य अटो कम्पोनेन्टहरुको प्रदर्शन गरेका छन् । प्रदर्शनीमा १३० स्टलहरुमा ९५ प्रदर्शकहरुले आफ्ना उत्पादन र सेवाहरु प्रदर्शन गरेर्को समेत नाडाले जनाएको छ । शोमा विभिन्न ब्राण्डले आकर्षक अफरहरु ल्याएका छन् ।

नाडाका अनुसार प्रदर्शनीमा ७ वित्तीय संस्थाहरुले अनुकूल वित्तीय समाधानहरु प्रदान गर्नेछन् । प्रदर्शनीलाई चार पाङ्ग्रे, दुई पाङ्ग्रे, हल्का व्यावसायिक सवारी साधन, अटो कम्पोनेन्ट र वित्तीय संस्थाहरुमा विभाजन गरिएको छ । नाडा अटो शो २०२४ ले ६ दिनको अवधिमा करिब ७५ हजार आगन्तुकहरुले अवलोकन गर्ने अनुमान गरिएको छ । यस बर्ष नाडा अटो शो पहिलेको भन्दा भव्य र प्रभावशाली हुने अपेक्षा गरिएको छ ।

यस बर्षको नाडा शोमा झण्डै २० अर्बको कारोवार हुने अटो व्यवसायीहरुले अनुमान लगाएका छन् । नाडा अटो शोमा व्यवसायीहरुले एक बर्षसम्म बिक्री गर्ने गाडीको झण्डै ४० प्रतिशत कारोवार गर्ने गरेका छन् ।